Расмий маалыматка ылайык, 1 миллион 118 миң кыргызстандык чет өлкөлөрдө эмгектенет. Анын 1 миллион 63 миңи Россияда. Калгандары Казакстанда, Түркияда, АКШда, БАЭде, Германияда, Канадада, Италияда жана Түштүк Кореяда иштешет. Ушул жылдын май айында 82 420 кыргызстандык кара тизмеге киргендиктен Россияга кире албай калган. Жогорку деңгээлдеги сүйлөшүүлөрдүн натыйжасында эки айдын ичинде 45 миң жаран кара тизмеден чыгарылды. Бул тууралуу Кубандык Акматбеков Sputnik Кыргызстан радиосунун эфиринде маек куруп жатып билдирди.
Анын айтымында, Кыргызстандагы 120дан ашуун жеке агенттик 19 мамлекетке жарандарды ишке орноштуруп жатат. Быйыл алар 5000ге чукул адамды чет мамлекетке иштөөгө жөнөттү. Алардын үстүнөн Жарандарды чет өлкөгө жумушка орноштуруу борбору мониторинг жүргүзүп турат.
"Эмгек мигранттарынын арасында Россия Федерациясы эң популярдуу өлкө. Бул жаатта Жарандарды чет өлкөгө жумушка орноштуруу борбору менен Россиянын ортосунда бир нече келишим бар. Мигранттар коопсуз шарттарда иштеп келүүсү үчүн Сахароводогу көп тармактуу миграция борбору менен март айында келишим түздүк. Ал жактан жарандар дактилоскопия, медициналык кароодон жана каттоодон өтүшөт. Жакында эле Эмгек, социалдык камсыздандыруу жана миграция министри Россияга иш сапары менен барып, ИИМ, Эмгек министрлиги жана көп тармактуу миграция борбору менен да жолугуп келди. Аталган борбордун филиалын Кыргызстандын Бишкек, Ош шаарларында ачууну пландап жатабыз. Учурда 30дан ашуун мамлекетте Кыргызстандын элчиликтери, консулдуктары бар. Биз алардын ар бири менен тыгыз иштешебиз. Биз жөнөткөн кыргыз жарандарынын тизмеси ар бир элчиге жөнөтүлөт", — деди Акматбеков.
Ал 21-22-сентябрда Германиянын Эмгек министрлигинин өкүлдөрү келип Эмгек, социалдык камсыздандыруу жана миграция министрлиги менен меморандумга кол коёрун, анын артынан жаңы келишимдер пайда болорун кошумчалады.