БИШКЕК, 5-сен. — Sputnik. Эсеп палатасынын тышкы адиси К.Э.Т. аттуу кызматкердин облустардын бириндеги жогорку окуу жайды текшерип жүрүп 150 миң сом пара алган фактысы аныкталды. Бул туурасында УКМКнын маалымат кызматынан кабарлашты.
"Эсеп палатасынын тышкы адиси финансылык ишмердикке формалдуу түрдө аудит жүргүзүү үчүн ТалМУнун кызмат адамдарынан 150 миң сом өлчөмүндө пара алганы аныкталган. Ал бүгүн кармалып, Талас облустук ИИБдин убактылуу кармоочу жайына киргизилди", — деп айтылган маалыматта.
Учурда УКМКнын жогорудагы фактыга тиешеси бар башка адамдарды аныктоо боюнча тергөө, ыкчам иш-чараларды жүргүзүп жатканы маалым болду.