БИШКЕК, 4-сен. — Sputnik. Кыргызстандын волейбол боюнча курама командасы Чолпон-Атада өткөн Азиянын чакырык кубогунда 1-орунду алды.
Турнирге Кыргызстан, Монголия, Сауд Аравия жана Өзбекстан болуп төрт команда катышкан. Биринчи турда Кыргызстан Монголиядан утулса, экинчи турда Өзбекстанды жеңген. Үчүнчү турда Сауд Аравияныкынан утулуп калган. Үч оюндун жыйынтыгында биздин команданын абалы начарлай түшкөн. Буга карабай алар 1-2-орун үчүн таймашууга мүмкүнчүлүк алышкан.
Финалда Кыргызстандын волейболчулары Сауд Аравиянын командасын 3:2 эсебинде жеңген.
Үчүнчү орун үчүн беттеште Өзбекстан Монголия командасын уткан. Эске салсак, Кыргызстандын волейбол боюнча курама командасы июлда да Борбор Азиянын чакырык кубогуна ээ болгон.