БИШКЕК, 3-сен. — Sputnik. Мамлекет башчы Садыр Жапаровдун эскертүүсүнөн кийин бардык министрликтер жана мамлекеттик органдар Санариптик өнүктүрүү министрлигине тиешелүү маалыматтарды берди. Бул тууралуу президенттин маалымат катчысы Эрбол Султанбаев билдирди.
Эскерте кетсек, мамлекет жетекчиси 20-август күнү санарип технологияга өтүү саясатына кайдыгер караган 14 мекемеге эскертүү берген. Жапаров 1-сентябрга чейин маалымат бербеген министрлер 2-сентябрда кызматынан кол жууй турганын, мындай мекемелер коррупциялашкан деп тааныла турганын билдирген болчу.
"Мамлекет башчынын эскертүүсүнөн кийин бардык министрликтер жана мамлекеттик органдар Санариптик өнүктүрүү министрлигине тиешелүү маалыматтарды бергенин маалымдайбыз", — деди Султанбаев.
Ал мамлекеттик башкаруу системасын санариптештирүү процесси өлкөнүн жогорку жетекчилигинин артыкчылыктуу багыты болуп саналарын, ал ар дайым президенттин көзөмөлүндө турарын белгилеген.