Жыл сайын өтүп келген кен тармагындагы "Мингео Сибирь" форуму быйыл "Мингео Евразия — 2022" деген аталыш менен Ысык-Көлдө өткөнү жатат. Бул тууралуу Ишимбай Чунуев Sputnik Кыргызстан радиосуна маек куруп жатып билдирди.
Анын айтымында, аталган иш-чара 15-16-сентябрда "Кыргызское Взморье" санаторийинде болот.
"Мингео Сибирь" деген кен тармагындагы чоң форум бар. Ага дүйнөнүн төрт бурчунан адистер катышып, аталган багыттагы маселелерди талкуулашат. Быйыл ушул иш-чара Ысык-Көлдө өткөнү турат. Форумдун катышуучулары өздөрү Кыргызстанда кен тармагында жүрүп жаткан өзгөрүүлөргө кызыгып, быйыл Ысык-Көлдө өтүшүн сунушташты. Ар өлкөдөн келген адистер, окумуштуулар 15-16-сентябрда эки күн болушат жана Кумтөргө барып, жеринен таанышып келишет. Мисалы, Монголиядан келчү адистер беш доклад даярдап жатышат. Андан сырткары, Россия Федерациясынан, бүтүндөй эле КМШ мамлекеттеринен адистер катышат. Биз алардын иш тажрыйбасын, илимий изилдөөлөрүн өлкөдөгү кен тармагында колдонсок болот", — деди Чунуев.
Профессор форумга аталган багыттагы кыргызстандык адистер да катыша аларын кошумчалады.