Орзубек Назаров 1966-жылы 30-августта Кант шаарында төрөлүп, балалыгы ошол жакта өткөн. Болочоктогу атактуу спортчу мектепте окуп жүргөндө аябай тентек болгондуктан апасы Жорохан аны он жашында спорт залга алып барган. Алгачкы жолу беттешке 12 жашында 28 килограмм салмак менен чыгып, атаандашын утуп алган соң спортко баш-оту менен киришкен.
Кийин 16 жашында өспүрүмдөр арасында СССРдин чемпиону, 18 жашында Эл аралык класстагы спорт чебери даражасына жетишкен. Талыкпас эмгектин аркасында спорт сүйүүчүлөрүнүн арасында СССРдин жаштар арасындагы мелдешинин төрт жолку жеңүүчүсү, Европанын эки жолку, СССРдин үч жолку чемпиону болгон.
Ал эми профессионалдар арасында Япониянын беш, Азия менен Океаниянын алты жолку, дүйнөнүн жети жолку чемпиону аталган. Спорт сүйүүчүлөрүнүн арасында 165 жолу рингге чыгып, 153 ирет жеңишке жетишкен. Профессионалдык рингде 28 беттеш өткөрүп, анын 27син уткан (23 нокаут менен). Сологой боксчу атаандаштарын боорго көбүрөөк муштаганы менен айырмаланган.
Дүйнөнү 22 жыл түрө кыдырып, эгемен өлкөнүн желегин желбиреткен спортчу тууралуу кызыктуу фактыларды Sputnik Кыргызстандын материалынан окусаңыз болот.