Баткен облусунун Кызыл-Кыя шаарында диний агымга берилген топтун мүчөлөрү жергиликтүү элдин үйүнөн акча уурдаган жана дагы башка кылмыштарды жасаган деп шектелүүдө. Бул туурасында ИИМдин маалымат кызматынан кабарлашты.
"Кызыл-Кыя шаарынын тургундарынан турган адамдардын тобу мыйзамга каршы иш-аракеттерди жасады деп шектелүүдө. Бул топтун бардык катышуучулары диний агымдардын бирине берилген. Алардын лидери, руханий насаатчысы "Абу Нур" деген лакап ат менен белгилүү Г.К. аттуу жаран", — деп айтылган ИИМдин маалыматында.
Алар башка дагы кылмыштарга шектелип, тергөө башталган. Мындан тышкары, бул адамдардын тобу укук коргоо органдарынын кызматкерлерине баш ийбей каршылык көрсөткөн жана башка мыйзамга каршы аракеттерди жасашкан деп шектелип жатканы кабарланды.
ИИМдин Кылмыш иликтөө башкы башкармалыгынын түштүк аймагы боюнча уюшкан кылмыштуулукка каршы күрөшүү башкармалыгынын жана Баткен облустук ИИБдин кызматкерлери кылмышка шектүүлөр жашаган үч жерди тинткен.
"Бул топ Кызыл-Кыя шаарында жашап, алардын ичинен экөө уюшкан кылмыштуу топтун мүчөсү катары ИИМдин ыкчам каттоосунда турары аныкталган. Мындан тышкары, тыюу салынган заттарды, тагыраагы, курал-жарактарды жана ок-дарыларды мыйзамсыз сактап жүрүшү мүмкүн деген ыкчам маалымат келип түшкөн", — деп билдиришти милициядан.
Соттун чечими менен бул кылмыштуу топтун мүчөсү болгон үч адам камакка алынды.
ИИМден учурда тергөө жана ыкчам-иликтөө иш-чаралары улантылып жатканы жана анын жыйынтыгы менен процесстик чечим кабыл алынарын билдиришти.
Тема боюнча: