БИШКЕК, 26-авг. — Sputnik. Режиссер Эрнест Абдыжапаровдун "Сагынбай манасчы" аттуу тасмасы XVIII Казань эл аралык мусулмандар киносу фестивалында көрсөтүлөт. Бул тууралуу Кинематографты колдоо фонду кабарлады.
Фестиваль 7-11-сентябрь күндөрү Казань шаарында өтөт. Тасма "Россия – Ислам дүйнөсү" конкурстук программасына киргизилген. Кыргызстанда фильм 8-сентябрдан тарта көрсөтүлө баштайт.
Фильм тууралуу
Тарыхый-биографиялык тасма Төлөмүш Океев атындагы "Кыргызфильм" киностудиясынын базасында 2022-жылы тартылган. Сюжет боюнча, Совет өкмөтү фольклорчу Ыбырай Абдрахмановго Сагынбай Орозбаковдун вариантындагы "Манас" эпосун кагаз бетине түшүрүү тапшырмасын берип, бирок кийин унутуп калат. Эпос өтө көлөмдүү болгондуктан төрт жыл бою ал үчилтиктин биринчи бөлүгүн гана жазат. Кийин Кыргыз Республикасынын түзүлгөнүн угуп, манасчыны жаңы жетекчилерге тааныштырып, материалдык колдоо көрсөтүүнү чечет. Бирок бийлик жардам кылмак тургай эпостон үзүндү укканга да убакыт жок экенин айтат. Мындан көп өтпөй манасчы каза болуп калат.
Казань эл аралык мусулмандар киносу фестивалы 2005-жылдан бери өткөрүлүп келет.