БИШКЕК, 26-авг. — Sputnik. Жаза аткаруу кызматы мурдагы президент Алмазбек Атамбаевге Москвада дарыланууга уруксат бербей койгонун адвокат Замир Жоошев билдирди.
Жактоочу жарыялаган документке ылайык, ЖАК "Атамбаевдин Россияга дарылануу үчүн кетүүгө мыйзамдуу негиздери жок" деп билдирген.
"Атамбаевдин абалы салыштырмалуу канааттандырарлык, ал №27 колониянын медициналык бөлүмүндө дарыланууда", — деп айтылат кызматтын жообунда.
Эске салсак, августта мурдагы президентти ооруканага жаткыруу үчүн Россиянын президентинин администрациясы чакырган. Адвокаттар Атамбаевге Россияда үч айга дарыланууга, балким операцияга уруксат берүү өтүнүчү менен ЖАКка кайрылышкан.
Жоошев белгилегендей, коргоочу тарап кызматтын жообун "адамдын ден соолугуна жана өмүрүнө болгон укугун бузуу" катары кабыл алат. Анткени, анын айтымында, Улуттук кардиология жана терапия борбору Атамбаевдин ден соолугуна Кыргызстанда аткарылбай турган медициналык олуттуу жардам керек деген тыянакка келген".
"Менин маалыматым боюнча, азыр Атамбаевге жок дегенде камеранын ичинде туруп басуу үчүн дары-дармек берилип жатат. Ал ден соолугуна байланыштуу бир айдан ашык убакыттан бери андан чыга элек. Бул дарылар Атамбаевди айыктыра албайт, жөн гана абалы оорлоп кетпеши үчүн кармап турат", — деди жактоочу.
Жоошев жарыялаган документте саясатчыны Улуттук кардиология жана терапия борборуна жаткыруу сунушталганы айтылат. Бирок ал өзү андан баш тарткан. Юрист "объективдүү себептерден улам бул мекеме белдин жана кызыл өңгөчтүн оорусун токтото албасын" кошумчалады.
Жоошевдин айтымында, адвокаттар Жогорку сотко апелляциялык арыз менен кайрылышкан.