БИШКЕК, 26-авг. — Sputnik. БУУ мамлекеттеринин көбү Киевдин Россияга каршы билдирүүсүн колдобогонунун себеби — дүйнөлүк коомчулук кризистин чыныгы масштабын түшүнө баштады. Бул тууралуу РФ Тышкы иштер министрлигинин расмий өкүлү Мария Захаровага шилтеме берип РИА Новости жазды.
Аталган билдирүү шаршемби күнү уюмдун штаб-квартирасында жарыяланган. Анда Россия атайын операциясын токтотпой жатканы сынга алынды. Бирок демилени уюмга мүчө-мамлекеттердин азы гана (үчтөн биринен азы) колдой алды. Билдирүүгө кол койгондордун арасында АКШ, Улуу Британия, Албания, Австралия, Канада, Чехия, Грузия, Франция, Япония, Латвия, Литва, Италия, Испания сыяктуу 54 өлкө бар.
"Ооба, Батыш Украинаны өзүнүн антироссиялык идеологиясына колдонуп жатат. Бирок учурда абал аны менен чектелип калган жок, масштабы кеңейип кетти. Муну башка мамлекеттер түшүнүп, азыркы аракеттер бардык континенттер үчүн ири коркунуч алып келе жатканын билип калышты", — деди Захарова.
Ал өлкөлөр Украина жаңжалы аймактык эмес, глобалдык көйгөй экенин түшүнүшкөнүн кошумчалады.
Россия 24-февралдан бери Украинада атайын операция жүргүзүп жатат. Президент Владимир Путиндин айтымында, түпкү максат — Донбассты бошотуу жана Россиянын өзүнүн коопсуздугуна кепилдик бере турган шарттарды түзүү.