БИШКЕК, 25-авг. — Sputnik. Канада Монреалда оңдолуп жаткан "Түндүк агым" газ куурунун беш турбинасын Германияга өткөрүп бергени жатат. Бул тууралуу өлкөнүн тышкы иштер министри Мелани Жолинин жергиликтүү ЖМКларга берген маегине шилтеме кылып РИА Новости жазды.
"Бул Германиянын өтүнүчү болчу. Биз ага макул болдук", — деди Жоли.
Эске салсак, бүткүл Европа көгүлтүр оттун олуттуу тартыштыгына дуушар болууда. Анткени Россиянын негизги түтүгү болгон "Түндүк агым" 20 пайыз кубаттуулук менен гана иштеп жатат. "Газпром" муну талапка жооп бербеген техникалык тейлөө жана Siemens турбиналары оңдоп-түзөөдөн кийин Канада тараптан кайтарып берилбей жатканы менен байланыштырган. Азыр куурду иштетүү үчүн беш кыймылдаткычтын бирөө гана колдонулуп жатат.
Жогоруда айтылгандай, өзгөчө кыйынчылык Канадада оңдолгон турбинаны кайтарып алууда жаралган. "Газпромго" каршы санкциялардан улам жергиликтүү бийлик аны өлкөдөн чыгарууга 10-июлда гана уруксат берген. Бирок келишимдин шарттары эске алынбай, кыймылдаткыч Россияга эмес, Германияга жөнөтүлгөн. Эми Россия аны андан ары ташуу үчүн ЕБ органдарынан жана Лондондон уруксат алуусу керек.
"Түндүк агым" – Балтика деңизинин түбүнөн өткөн Россия менен Германиянын ортосундагы негизги газ куурунун бир бөлүгү.