БИШКЕК, 24-авг. — Sputnik. Билим берүү жана илим министрлигинин Китеп басып чыгаруу, мектепте окутуу саясаты боюнча башкармалыгынын жетекчиси Самаркүл Умралиева Кыргызстандагы бала бакчаларды натыйжалуу пайдалануу боюнча пилоттук долбоор тууралуу айтып берди.
Билим берүү жана илим министрлигинин Китеп басып чыгаруу, мектепте окутуу саясаты боюнча башкармалыгынын жетекчиси Самаркүл Умралиева
Ал Sputnik Кыргызстан агенттигинин мультимедиалык маалымат борборунда өткөн "Кыргызстандагы мектеп жана бала бакчаларда коопсуздук кандай каралган" аттуу брифингге катышкан.
Умралиева билдиргендей, Билим берүү жана илим министрлиги Япония, Швециянын тажрыйбасын интернет аркылуу үйрөнүп, эки жыл бала бакчалардагы бош жайларды натыйжалуу пайдалануу боюнча сыноо жүргүзгөн.
"Аталган өлкөлөрдө оюн аянтчасы катары балдарга бөлмө бөлүнөт. Ал жакты желдетип, бөбөктөр сыртта ойноп келген соң ошол эле бөлмөдөгү жумшак матраска уктай берет. Долбоорду сынап көрүү үчүн Бишкекте беш, Ошто беш кылып 10 бала бакчаны алдык. Мындай долбоор Аламүдүн, Сокулук райондорунда да жүргүзүлдү. Айрым бала бакчалар долбоорду окуу жылынын аягына чейин ийгиликтүү ишке ашырды. Бирок кээ бири балдарды жерге, матраска жаткырганы үчүн Санитардык-эпидемиологиялык көзөмөл департаментинин чечими менен айыпка жыгылышты", — деди Умралиева.
Адис бул долбоор боюнча иш токтотулганын айтып, бирок Кыргызстан үчүн жакшы тажрыйба болгонун кошумчалады.
"Бакчада уктоочу бөлмөлөр суткасына болгону эки саат эле пайдаланылат, башка учурларда бош. Эгер Бишкектеги бала бакчаларга дагы бир тайпа кошо турган болсок, бакчага азыркыдан бир топ бөбөк кабыл алынмак. Анын үстүнө үнөмдүү да болмок. Санитардык нормаларды кайра карап чыгуу үчүн Саламаттык сактоо министрлигине кат жаздык. Бөбөктөрдүн ден соолугуна зыян келтирип албаш үчүн атайын стандарт ойлоп чыккан оң. Буга ата-энелердин да макулдугу керек", — деди ал.
Умралиева долбоорду ишке киргизүү жумуштары улана турганын белгиледи.