БИШКЕК, 23-авг. — Sputnik. Интернетте Mercedes-Benz үлгүсүндөгү автоунаанын айдоочусунун үч инспекторго каршылык көрсөткөн видеосу пайда болду.
Кайгуул милиция башкармалыгынын маалымат катчысы Байказы Айтикул уулу билдиргендей, бул окуянын алдында айдоочу инспекторлордон качкан. Кайгуул милициясы аны жол эрежесин бузганы үчүн Киев жана Исанов көчөлөрүнүн кесилишинен токтотууга аракет кылган. Бирок айдоочу эрежеге баш ийбей, качып, инспекторлор аны Абдрахманов көчөсүнөн кармашкан.
Кайгуул милиция башкармалыгынын маалыматы боюнча, айдоочу колго түшкөн учурда каршылык көрсөтүп, инспекторлорду эки ирет тээп жиберген. Ага карата үч протокол түзүлүп, 7 500 сом айып салынганы айтылды.
Айдоочу Биринчи май РИИБине жеткирилип, автоунаа ээси төлөбөй жүргөн 28 миң сом үчүн айып короого токтотулган.