БИШКЕК, 22-авг. — Sputnik. Социалдык тармакка Ульяновск облусундагы М-5 Урал трассасындагы 14 кыргызстандыктын өмүрүн алып кеткен автокырсыктан кийинки видеолор тарады.
Бир видеодо комментарий кылган адам трагедия Москва – Самара жолунун 808-чакырымында болгондугун айтып жатат. Ал кырсыкка кабылгандарды жолго чыгарда билгендер, маалыматы болгондордон маркумдардын, жарадарлардын аты-жөнүн, ким экендигин тактоого көмөк көрсөтүүнү суранган.
Эске салсак, бүгүн, 21-августта, жергиликтүү саат 14:00 ченде Николаев районунда 16 адамдын өмүрүн алган жол кырсык болгон.
Элчилик каза болгондордун саны 16, алардын 14ү кыргызстандыктар экенин билдирди. Ал эми калган эки адам тууралуу азырынча маалымат бериле элек.
Жүк ташуучу автоунаанын айдоочусу фураны токтото албай калып, оңдолуп жаткан жолдо өтүү үчүн кезегин күтүп токтоп турган микроавтобусту келип сүзгөн. Маршрутканын алдында да жүк ташуучу ири автоунаа болгону, ичинде жүргүнчүлөрү бар бус эки фуранын ортосунда калып кишилердин көз жумганы айтылган.
Тараган видеолордон ак түстүү кичи автобустун таптакыр эле жанчылып, эки кат болуп калгандыгын көрүүгө болот.
Кыргызстандын Россиядагы элчилигинен учурда трагедия болгон жерге консулдуктун кызматкерлери чыгып кеткенин билдиришти.
"Жогорудагы окуянын бардык жагдайларын тактоо максатында Ульянов районунун укук коргоо жана компетенттүү органдарынын өкүлдөрү менен байланыш түзүлдү", — деп билдиришти.
Элчилик каза тапкан, жарадар болгон кыргызстандыктардын жакындары үчүн +7 (926) 861 50 98 номерлүү түз байланыш телефонун уюштурду.
ТИМде да +996 508 628-588, +7 977 947 55 80, +996 551 312-000 (WhatsApp) телефон номерлери түз байланыш үчүн ачылды.
Ал эми бул кырсык боюнча Россиянын Тергөө кызматы иш козгогону кабарланды.