Советтер Союзу учурунда санитардык авиацияда тик учактар болгон экен. Бирок учурда, тилекке каршы, бирөө да жок. Бул тууралуу Жаркынбек Касымбеков Sputnik Кыргызстан радиосуна маек куруп жатып билдирди.
Анын айтымында, министрликтин жакынкы аралыкта тик учак алуу пландары жок.
"Биз тоолуу район болгондуктан бир аймактан экинчи жерге жок дегенде эки капчыгайды ашып анан жетебиз. Бул көп убакытты алат. Айрым учурларда адам өмүрү үчүн сааттар эмес минуталар да баалуу. Андыктан санавиацияны күчтөндүрүп, жок дегенде 7-8 тик учак алуу маселеси курч турат. Мен учурдан пайдаланып президентке кайрылып кетер элем. Эгер биз чын эле улуттук медицинанын сапатын жогорулатууну кааласак бул багытта тик учактарды алуу керек. Алар бир гана медициналык максатта эмес, ар кандай өзгөчө кырдаалдар жаралганда жарандарды кырсыктан алып чыгууда да колдонулмак", — деди Касымбеков.
Ал ошондой эле жалпы медициналык мекемелердин абалы да көңүл кубантарлык эмес экенин кошумчалады.