БИШКЕК, 16-авг. — Sputnik. Ереван шаарында "Сурмалу" соода борборундагы жарылуунун кесепетинен каза болгондордун саны 16га жетти, анын бири жаш бала. Бул туурасында Sputnik Армения агенттиги Өзгөчө кырдаалдар министрлигине таянуу менен билдирди.
"Издөө-куткаруу иштеринин жүрүшүндө 16 адамдын сөөгү табылды. Тогуз кишинин, анын ичинде бир жаш баланын ким экени аныктала элек", — деп айтылат билдирүүдө.
Мындан сырткары, ӨКМдин куткаруу кызматына түшкөн чалуулар боюнча 18 адамдын дайыны чыкпай жатат, алардын арасында Россиянын жана Ирандын бирден жараны бар.
Белгилей кетсек, 14-августта Армениянын борбору Еревандагы "Сурмалу" сооба борборунда кырсык катталган. Мэриянын маалыматына караганда, пиротехникалык материалдарды сактаган кампа жарылган. Жаракат алган 61 адам ооруканага жеткирилген.
