БИШКЕК, 15-авг. — Sputnik. Адам тамакты каалаган өлчөмдө жей берсе болот. Болгону калорийди ашырбаш керек. Бул тууралуу РИА Новости агенттигине эндокринолог Роман Терушкин айтып берди.
"Адам тоюш үчүн ашказан толтура тамак жеши керек. Анткени ашказан толгондо гана бул тууралуу мээге белги бере турган гормондор бөлүнүп чыгат. Салмакты нормасында кармагысы келген кишилер ашказанды толтуруу үчүн калорийи аз, жеңил-желпи азыктарды жесе болот. Албетте, тамакты тарта жеген адамдар дагы жок эмес, бирок чала тоют болуп жүрүү психологиялык жактан кыйын. Ага кишилердин бардыгы эле чыдай бербейт", — деди Терушкин.
Ошондой эле адис кандай тамактар адамды көпкө чейин ток кармай турганын түшүндүрдү. Анын айтымында, курамында май көп тамакты жеген киши бир нече саатка ачка болбойт. Ал эми углеводго бай тамактар өтө тез сиңип кетет.
Сөзүнүн соңунда эндокринолог учурда интернет булактарында калорийди санай турган каражаттар көп экенин эске салды. Мисалы, ар бир адам жаш курагы, жашоо образы, салмагы жана боюна жараша бир күнгө же аптага канча калорий талап кылынарын аныктап алса болот. Андан соң ошончо калорийден ашырбай, бирок каалаган тамагын жей алат.