БИШКЕК, 13-авг. — Sputnik. Жер жана Суу кодекстеринин жаңы редакциясын иштеп чыгуу — бүгүнкү күндүн талабы. Аталган жаратылыш ресурстарын базар мамилелеринин объектиси катары карай турган учур келди. Бул тууралуу министрлер кабинетинин төрагасынын орун басары Бакыт Төрөбаев билдирди.
Эске салсак, 15-июлда мамлекет башчы Айыл чарба министрлигине Жер жана Суу кодекстеринин жаңы редакциясын иштеп чыгууну тапшырган. Аталган кодекстерди иштеп чыгуу боюнча жумушчу топ түзүлгөн.
"Жер жана Суу кодекстердин кабыл алынганына 20 жылдан ашык убакыт өттү, ошондуктан учурдун талабына жооп берген мыйзам кабыл алуу керек. Бул кодекстер жерди жана сууну жаратылыш ресурсу катары, ошол эле учурда базар мамилелеринин объектиси катары караган ченемдерди камтышы зарыл", — деген Төрөбаев.
Мындан тышкары, ал кодекстерди иштеп чыгууга жылдын аягына чейин убакыт берилгенин айтып, отурумдун катышуучуларын буга олуттуу мамиле кылууга чакырган.
Аны менен бирге мыйзам долбоорунда бири-бирине карама каршы келген ченемдер бар экенин, аны талдап чыгуу зарылдыгын белгилеген.