Азыркы учурда Ош жергесинин Кара-Суу районунда, Жалал-Абаддагы Сузак, Ноокен райондорунда, Чүй облусунун Фрунзе айылында, Бишкек шаарында дыйкандарга жана фермерлерге колдоо көрсөткөн беш түйүн ишке кирди. Андан тышкары өлкөнүн ар кайсы аймактарында көп жылдан бери иштеп келе жаткан чекиттер бар. Ал жерде минералдык жер семирткичтер сатылат. Бул тууралуу Турусбек Асаналиев Sputnik Кыргызстан радиосунун эфиринде маек куруп жатып билдирди.
Анын айтымында, суу, техника, жер семирткич, каражат маселелери дыйканды түйшөлтүп келет.
"Кыргызстанда дыйкандарга жана фермерлерге көмөктөшүү максатында 41 түйүн ачылат. Бул түйүндөр "Бай дыйкан" айыл чарбаны колдоо борборунун долбоору болуп саналат. Ал түйүндөрдө дыйкандар үчүн бир топ жеңилдиктер каралган. Жер семирткичтерди, экологиялык таза химиялык заттарды, сапаттуу үрөндөрдү банк аркылуу үстөк пайызы жок сатып алса болот.
Ар бир түйүндө тажрыйбалуу агроном, химиктер акысыз кеңеш беришет, дыйкандарга техника жана күйүүчү май маселесин чечүүгө көмөк көргөзөт. Дыйкандар жердин курамын текшерүү үчүн жерди Бишкек же Ош шаарына жөнөтпөстөн, түйүндөрдөгү агролабораторияларда жыл сайын же эки жылда бир жолу жеринен текшерүүгө мүмкүнчүлүк ачылат. Жерди айдоодон мурун, анын акыбалын билүү зарыл. Жердин кубаттуулугун жана суунун курамын текшерип алса, дыйканга жеңил болуп, жакшы түшүм алат", — деди Асаналиев.
Ал айыл чарбасын өнүктүрүү үчүн дыйкандардын сабаттуулугун жакшыртуу, туура маалымат жеткирүү маанилүү экендигин кошумчалады.