БИШКЕК, 8-авг. — Sputnik. Аламүдүн районуна караштуу Мраморный айылында катуу шамал 17 үй, эки сарайдын чатырын учуруп кетти. Бул тууралуу ӨКМдин маалымат кызматы кабарлады.
Билдирмеге караганда, аталган айылда шамалдан бак-дарак, электр мамычалары жабыркап, жарык үзгүлтүккө учураган.
Табигый кырсык катталган жерге ӨКМдин Аламүдүн райондук бөлүмүнөн алты куткаруучу, айыл өкмөттүн төрт өкүлү жана РЭТ мекемесинен үч бригада тартылган. Учурда электр энергиясын калыбына келтирүү иштери жүргүзүлүп жатканы айтылды.