БИШКЕК, 5-авг. — Sputnik. Жылдын биринчи жарымында өлкөдө жол кырсыктары 11 пайызга кыскарган. Бул тууралуу Жол кыймылы коопсуздугун камсыздоо башкы башкармалыгына шилтеме берип Улуттук статистика комитети кабарлады.
Маалыматка караганда, январь-июнь айларында республиканын аймагында 3 миң жол-транспорт кырсыгы катталган. Алардын эң көбү Бишкек шаарында (44 пайыз), Чүй (20 пайызы) жана Ош (9 пайызы) облустарына туура келди.
Жол-транспорт кырсыктарынан 4 629 адам жабыр тартты, бул 2021-жылдын алты айына салыштырмалуу 8,7 пайызга аз. Ал эми каза болгондордун саны — 248 (24,6 пайызга аз).
Анткен менен балдар аралашкан жол кырсыктары өткөн жылдын деңгээлинде кармалып турат. Тагыраагы, 800дөн ашык жол кырсыгында 37 бала каза болуп, 929у жаракат алган.