БИШКЕК, 4-авг. — Sputnik. Кытайдын Элдик-боштондук армиясы Тайвандын айланасында масштабдуу машыгууларын баштады. Бул тууралуу Кытайдын борбордук телеканалына шилтеме берип РИА Новости билдирди.
АКШ Өкүлдөр палатасынын спикери Нэнси Пелосинин Тайбэйге сапарына жооп иретинде жасалган машыгуулар бейшемби күнү жергиликтүү убакыт боюнча саат 12:00дө (Бишкек убактысы боюнча 10:00) аралдын тегерегиндеги алты аймакта башталды. Ал жекшемби күнү түшкө чейин уланат.
Кытай тарап машыгуу өтүп жаткан аймактардагы кемелер менен учактарга акваторияга жана аба мейкиндигине кирбөө тууралуу эскертүү берди.
Ал эми Кытайдын Мамлекеттик кеңешинин Тайвань иштери боюнча кеңсесинин өкүлү Ма Сяогуан Пелосинин Тайванга сапарын "демократия менен эркиндикти бузуу" деп баалады.
"Бул нерсе Кытайдын суверенитети жана аймактык бүтүндүгүн бузуу аракети болуп калды", — деди Ма Сяогуан.
Эске салсак, 2-август күнү кечинде АКШ Конгрессинин Өкүлдөр палатасынын спикери Нэнси Пелоси Тайванга барган. Ал сапарга кам көрүп жатканда эле Кытай бийлиги Пелосинин аралга келиши "бирдиктүү Кытай" принцибине каршы келерин жана кырдаалды курчутарын эскерткен. Пелоси учуп келе жаткан учакты Кытай истребителдери тосуп алышы мүмкүн деген божомолдор айтылган. Бирок Кытай тараптан андай аракеттер болгон жок. Пелосинин Тайванга сапары кечээ, 3-августта, аяктаган.
Пелосинин сапары Тайвань булуңундагы чыңалууга түрткү болду. Пекин 4-7-августта аскердик машыгуулар болорун жарыялоодон тышкары Тайвандын эки фондуна санкция киргизди. Мындан тышкары, Тайвандан цитрус жемиштерин жана балык азыктарынын айрым түрлөрүн импорттоону токтотту.
Тышкы иштер министрлиги Кытай катаал чараларды көрүүгө ниеттенип жатканын, Пекин бир нече айдан бери каршы болуп келген визиттин бардык терс кесепеттери али алдыда экенин ачыктады.