БИШКЕК, 2-авг. — Sputnik. АКШнын мамлекеттик катчысы Энтони Блинкен Кошмо Штаттар Конгрессинин Өкүлдөр палатасынын спикери Нэнси Пелоси Тайванга барса Кытай кырдаалды чыңалтпай сабырдуу болушу керектигин билдирди. Бул тууралуу РИА Новости жазды.
"Эгер спикер Тайванга барып, Кытай абалды чыңалтса, анда жоопкерчилик Пекиндин мойнунда болот", — деген Блинкен журналисттерге.
Ал конгресс көз карандысыз структура экенин белгилеп, Пелоси аралга барар-барбасын өзү чечерин билдирген. Блинкендин айтымында, АКШнын мыйзам чыгаруучулары буга чейин деле Тайванда болушкан. Мамлекеттик катчы Пелоси кокус Тайванга бара турган болсо, Вашингтон Пекинден жоопкерчиликтүү мамиле күтөрүн белгилеген.
Ал арада Кытайдын БУУдагы туруктуу өкүлү Чжан Цзюнь Пелосинин Тайванга барышы Америка — Кытай мамилелерине доо кетире турганын эскертип, Тайвань Кытайдын ажырагыс бөлүгү экенин белгиледи.
Тайвандын Куралдуу күчтөрү болсо Нэнси Пелосинин сапары жана Пекиндин реакциясынан улам 2-августтан 4-августка чейин аскер техникасынын даярдагын күчөтүп жатканы маалым болду.
Эске салсак, Пелосинин 2-августта Тайванга барышы мүмкүн экени айтылган. Адегенде Пелоси баштаган америкалык делегациянын Тайванга сапары апрель айына пландалган. Пекиндин нааразычылыгын жарата турган бул сапар АКШ Конгрессинин Өкүлдөр палатасынын спикеринин 1997-жылдан бери аралга жасаган алгачкысы болот.