БИШКЕК, 31-июл. — Sputnik. Куткаруучулар Чу дарыясына сел суулары агызып кеткен Toyota Sienna үлгүсүндөгү унааны издеп жатат. Бул тууралуу ӨКМдин маалымат кызматы кабарлады.
Куткаруучуларга маалымат кечээ, 30-июлда, түшкөн. Анда Бишкек — Нарын — Торугарт унаа жолунун болжол менен 135-чакырымында автоунааны сел суулары дарыяга агызып кеткени кабарланган.
ӨКМ унаанын ичиндеги беш киши сыртка чыгууга үлгүргөнүн, бирок жеңил жаракаттарды алганын белгиледи. Учурда унааны куткаруучулар издеп жатат.
Эске салсак, кечээ, 30-июлда, Боом капчыгайында жамгырдан улам сел жүрүп, кум, шагыл автоунаа жана темир жолду жаап калган. Бүгүн жол ачылган.