Жашыл энергетиканы өнүктүрүү үчүн аукцион системасына өтүү зарыл. Бул тууралуу Бекнур Маратбеков Sputnik Кыргызстан радиосуна маек куруп жатып билдирди.
Анын айтымында, кайра жаралуучу булактардан энергетика сатып алган мамлекеттик компаниялар тарифтин төмөндүгүнөн чыгашага учурап жатат.
"Энергиянын кайра жаралуучу булактары жөнүндө" мыйзам 2008-жылы иштелип чыккан. Андан бери алты жолу өзгөртүү киргизилди, бирок натыйжа чыккан жок. Анткени энергетика тармагындагы мамлекеттин үлүшү бар ишканалар, "Электр станциялары" ишканасынын, электр энергияны бөлүштүрүүчү компаниялардын финансылык мүмкүнчүлүктөрү чектелген. Анткени өлкөдө электр энергиясына болгон тариф аймактагы өлкөлөргө салыштырмалуу төмөн. Ошол эле учурда кайра жаралуучу булактар менен иштеген ишкерлер үчүн тарифтер жогору. Башкача айтканда, электр энергиясы калкка 1 сом 56 тыйындан сатылса, ишкерлерден 3 сом 27 тыйындан сатып алууда. Ортодо пайда болгон ажырымды энергетика компаниялары өз мойнуна алууда. Бул рыноктук механизмдерге туура келбейт. Себеби ишканалардын негизги максаты — пайда табуу. Жашыл энергетика жакшы өнүккөн өлкөлөр деле 10-15 жыл мурда дал ушундай жолду басышкан. Кыргызстан муну жөнгө салуу үчүн бул багытты карап чыгуусу керек. Анын бирден-бир жолу энергиянын жетиштүү көлөмү камсыздалган соң аукцион механизмине өтүү зарыл. Ошондо күчтүү компаниялар рынокто калат. Мисалы, тармактык министрлик энергетикада болгон дефицитти чыгарып берет. Аны мамлекеттик компания белгиленген тариф менен сатып алат. Кайсы компания төмөн баа сунуштаса, ошол жеңет. Бул жерде эң башкысы сапат жана арзан баа", — деди Маратбеков.
Ошондой эле ал инвесторлорго кызыктуу шарттарды түзүү зарыл экенин кошумчалады.