БИШКЕК, 27-июл. — Sputnik. Кээ бир саясатчылардын ылгабай сүйлөгөнүнөн улам "Жогорку Нарын ГЭСтер каскады" долбоору "РусГидро" компаниясына эл аралык соттон утулуп калдык. Бул туурасында юстиция министри Аяз Баетов маалымат жыйында билдирди.
Ал сотто бир катар депутаттардын жана мамлекеттик кызматкерлердин ачык маалымат булактарында айткан сөздөрү кыргыз өкмөтүнө каршы колдонулганын билдирди. Мындан улам кыргыз тарап 39 миллион доллар төлөөгө милдеттендирилген.
"Эгер соттун чечимдерин жана аркы тараптын аргументтерин окугусу келгендер болсо, маалыматты беребиз. Биз анда юридикалык жагынан эмес, кээ бир саясатчылардын жана мамлекеттик кызматкерлердин ЖМКларга чыгып активдүү сүйлөй бергенинен улам жеңилдик. Себеби алардын ар бир сөзү жазылып, архивге сакталып, эл аралык арбитраждык сотто колдонулду. "Русгидро" буга анык мисал боло алат. MegaCom боюнча дагы ушундай болгон, бир депутат чыгып "MegaCom компаниясын мен алып келгем" деген экен. "Мына, тартып алгансыңар" деп ошол сөзүн колдонушту. Мамлекеттик укуктары бар адамдар эч качан сотто турган иш боюнча ооз ачпаш керек. Себеби депутаттын, аткаминердин айткан ар бир сөзү эл аралык сотто колдонулат. Андыктан мындай маселелерде этият болууга чакырам", — деди Баетов.
Ошондой эле министр "Русгидро" иши боюнча апелляцияга берүүгө октябрга чейин убакыт бар экенин, учурда реалдуу мүмкүнчүлүктөрдү карап, ойлонуп жатышканын белгиледи.
Эске салсак, "Жогорку Нарын ГЭСтери" ишканасы 2012-жылы Жогорку Нарын каскадынын курулушу үчүн түзүлгөн. Россиянын "РусГидро" жана Кыргызстандын "Электр станциялары" 50 пайыздык акцияларга ээ. Долбоор башталып-башталбай түзүлгөн келишим жокко чыгарылган. Россиялык ишкана ага кеткен 37 миллион долларды өндүрүп алуу үчүн эл аралык арбитраждык сотко кайрылган.
Долбоордун наркы 727 миллион долларды түзгөн жана 238 мегаваттык төрт станцияны куруу пландалган. Анткен менен Россиядагы экономикалык көйгөйлөрдөн улам келишим 2016-жылы жокко чыгарылган.