БИШКЕК, 27-июл. — Sputnik. Ушул күздө президент Садыр Жапаров араб өлкөлөрүнө иш сапар менен барат. Бул туурасында тышкы иштер министри Жээнбек Кулубаев маалымат жыйында билдирди.
"Биз Бириккен Араб Эмирлиги, Катар, Бахрейн менен иш сапардын күн тартибин макулдашуудабыз. Учурда ал жакта күн аябай ысык экен. Ошондуктан биз күн бир аз салкындагандан кийин, күздө же жыл соңуна чейин сапарды уюштурууну пландап жатабыз", — деди Кулубаев.
Мындан сырткары, ал Түркиянын президенти Режеп Тайип Эрдогандын Кыргызстанга жыл аягына чейин расмий сапары менен келери күтүлүп жатканын билдирди.