БИШКЕК, 27-июл. — Sputnik. Батыштын бир тараптуу экономикалык санкциялары биринчи кезекте калктын аялуу катмарына жана коргоого муктаж болгондорго кесепетин тийгизип жатат. Тагыраагы, жумушсуздуктун, коррупциянын, сексуалдык эксплуатациянын жана кылмыштуулуктун өсүшүнө алып келүүдө. Бул тууралуу БУУнун атайын баяндамачысы Елена Довганга шилтеме берип РИА Новости жазды.
"Бир тараптуу мажбурлоо чаралары бүгүнкү күндө тилектештиктин, универсалдуулуктун, өнүгүүнүн жана адам укуктарын коргоонун эң олуттуу коркунучу экенин моюнга алуу керек", — деди Довгань адам укуктары боюнча Пекин форумунда сүйлөп жатып.
Анын айтымында, экономикалык санкциялар жумушсуздукка, көмүскө экономикага түрткү болуп, өзгөчө жакырларга, аялдарга, дегеле коомдун аялуу катмарына көлөкөсүн түшүрүүдө.
"Эл аралык мамилелердин негизи катары ар бир мамлекет жана ар бир эл аралык уюм тарабынан кызматташтык, диалог, мыйзам үстөмдүгү, дискриминацияга тыюу салуу жана кош стандарттарга каршы турганда гана адам укуктары корголуп, ишке ашат", — деди ал.
Февраль айынын соңунда Россия Украинаны демилитаризациялоо боюна атайын операциясын баштаган. Президент Владимир Путин Россияны алсыратуу саясаты Батыштын узак мөөнөттүү стратегиясы экендигин, ал эми санкциялар дүйнө экономикасынын шайын бир топ эле алып койгондугун эскерткен. Анын айтымына караганда, Батыштын максаты — миллиондогон адамдардын жашоо-турмушун начарлатуу.