БИШКЕК, 26-июл. — Sputnik. Канадалык компания Centerra Gold Inc. Кумтөр алтын кени боюнча Кыргызстан менен өз ара дооматтарды глобалдык жөнгө салуу боюнча макулдашуунун шарттарын бекитти. Бул тууралуу министрлер кабинетинен билдиришти.
Кечээ, 25-июлда, компаниянын акционерлеринин кезексиз жыйыны болуп өттү.
"Келишимдин алгоритмине ылайык, Кумтөрдү толугу менен кыргыз тараптын көзөмөлүнө өткөрүп берүүнү жол-жоболоштурууну аяктоо үчүн бир нече техникалык процедура калды", — деп айтылат маалыматта.
4-апрелде президент Садыр Жапаров Centerra Gold Inc. менен келишимге кол койгонун жарыялаган.
Документ төмөнкү пунктуларды камтыйт:
Кумтөр кени толугу менен кыргыз тараптын карамагына өтөт, мында 2021-жылдын 15-майынан тартып алынган бардык киреше өзүндө калат;
Centerra Gold Inc. 11 миллион доллар дивиденд төлөйт;
компания тарабынан кыргыз тарапка 50 миллион доллар өлчөмүндө бир жолку төлөм макулдашылды;
Кыргызстан Кумтөрдү рекультивациялоо фондун (53 миллион долларга жакын) башкарууну өзүнө алды;
Centerra 2021-жылдын май айында алтынды жөнөтүү үчүн койгон 29 миллион долларлык дооматынан баш тартат жана АКШ, Швеция, Канадада кыргыз тарапка каршы козголгон бардык доо арыздарын кайтарып алат.