БИШКЕК, 23-июл. — Sputnik. Кыргызстандык төрт өспүрүм кыз Россиянын "Большая перемена" конкурсунда утуп чыгып, РФтин алдыңкы жогорку окуу жайларында акысыз билим алууга мүмкүнчүлүк алды. Бул туурасында Бишкектеги "Русский дом" билдирди.
Финал Крымдагы "Артек" лагеринде өттү. Эл аралык конкурска жалпысынан 500 окуучу катышып, анын ичинен 58и жеңүүчү болгон.
Эки күндүн аралыгында финалга чыккандар 10-12 адамдан топ-топко бөлүнүп Россия боюнча туристтик маршруттун долбоорун иштеп чыкты. Калыстар беш компетенция боюнча баалады. Ал сапаттар — командада иштегенди билүү, креативдүүлүк, логикалык ой жүгүртүү, коммуникация жана кызматташуу жөндөмү болду.
Мындан сырткары, Кыргызстандан барган сегиз финалчы "Больше, чем путешествие" программасынын алкагында поезд менен Санкт-Петербургдан Владивостокко чейин барат жана кайтып келе жатып Россиянын ири шаарларын кыдырып, ажайып жайларын көрүшөт.