Кемин районунун Тар-Суу айылынын тургундары мындан тогуз жыл мурда "Шумкар-Төр" коомдук бирикмесин түзүп, 20 миң гектардан ашык аянтта байырлаган жаныбарларды аңчылардан коргоп келет. Ал жактагы жапайы жаныбарлардын саны азыр арбып калды. Жакында айылдаштар Бириккен Улуттар Уюмуна долбоор жазып, аймакта сейрек кездешкен жаныбарларды көрүү үчүн келгендерге атайын жай курду. Кароол аянтчасы кооз жаратылыш койнунда эс алгысы келгендер үчүн өтө ыңгайлуу. Жапайы жаныбарларды өз көзүм менен көрөм дегендер ал жактагы егерлердин үйүндө тамактанып, андан ары ат менен кароол аянтчасына жетип, жапайы жаныбарларга дүрбү менен көз салып сүрөткө тарта алат.
Буга чейин узак убакыт айлык албай, өз акчасын сарптап иштеп келгендер эми ушинтип кошумча киреше жолун таап, туризмдин жаңы багытын өздөштүрө башташты.
Аталган коомдук бирикменин мүчөсү Темирбек Абдыкадыров кароол аянтча бир айда курулуп бүткөнүн айтууда.
"Курулуш алыс жерде болгондуктан техника жеткен жерге трактор, автоунаа менен, андан ары темир-тезек, тактайларды ат менен, жөө жеткирдик. Бул жакта электр жарыгы да жок болгондуктан бир айда салып бүттүк. Эми каалоочулар келип бугу, элик, каман, аюуларды көрө алат. Түшкөн каражат жапайы жаныбарларды коргоого жумшалат", — деди Абдыкадыров.
Учурда 10 адамдан турган демилгечи топтун карамагындагы 20 миң гектар жерде 300дөн ашык элик, 100 баштай бугу, 200дөй баш жапайы чочко байырлайт. Ошондой эле кашкулак, суур, сүлөөсүн, түлкү, кыргоол, кекилик, чил, кара кур, улар бар.
Тема боюнча: