БИШКЕК, 19-июл. — Sputnik. Ирандын президенти Сейед Эбрахим Раиси Россия лидеринин сапары аймактык жана эл аралык күн тартибинде бурулуш жасайт деп үмүттөнөт.
Эске салсак, Владимир Путин бүгүн Тегеранга иш сапары менен барган.
Иран президентинин айтымында, Москвадагы жана Ашхабаддагы жолугушуудан кийин окуялар абдан тез өнүгүп жатат. Эки тарапта тең мамилелерди өнүктүрүү жана иш жүзүнө ашыруу үчүн зарыл болгон саясий эрк бар.
Ал белгилегендей, эки өлкөнүн Сирия багыты боюнча жетиштүү тажрыйбасы бар. Раиси регион бул тажрыйбадан, бул кызматташтыктан улам коопсузураак болуп калды деп эсептейт.
"Башка өлкөлөр терроризмге каршы күрөшүп жатабыз деп көп айтышат, бирок терроризмге каршы күрөштө биздин мамилебиз жана кызматташтыгыбыз алдыга койгон максаттарга жете аларыбызды далилдеди. Менимче, бул коопсуздукту чыңдоо жагынан баа жеткис тажрыйба. Сиздин Иранга сапарыңыз аймактык жана эл аралык күн тартибиндеги маселелер боюнча бурулуш жасайт деп үмүттөнөм”, — деди Ирандын президенти.
Буга жооп катары Путин эки өлкөнүн мамилеси жакшы темпте өнүгүп жатканына макул болду.
"Сооданын өсүшү боюнча рекорддук көрсөткүчтөргө жеттик. Биз Сирия жаңжалын жөнгө салууга олуттуу салым кошуп, эл аралык коопсуздук маселелери боюнча кызматташуубузду чыңдап жатабыз", — деди Путин.