БИШКЕК, 19-июл. — Sputnik. Европадагы танкерлердин ээлери Евробиримдиктин күчүнө кире турган эмбаргосунун алдында Россия нефтилерин ташуу көлөмүн улам көбөйтүп жатканын The Wall Syreet Journal жазды.
Грециялык кемелер рекорддук көлөмдө ташып жатканы айтылды: май менен июнда алар россиялык портко, Кара деңиз менен Балтикага былтыркыга салыштырмалуу эки ирет көбүрөөк кирип чыгышкан.
Европалыктар Азия мамлекеттери тарабынан арткан суроо-талаптан улам Россия мунай затын көбүрөөк сатып алууга умтулуп жатышат. Vortexa аналитикалык компаниясынын маалыматтарына караганда, Кытай акыркы айлары энергоресурстардын импортун эки эсеге көбөйткөн. Тагыраагы, февралда күнүнө 670 миң баррелден башталып, июнда 1,13 миллионго чейин арбыган.
Азырынча кемелердин ээлери анча кыйналбай “ишин жүргүзүп” жатканы айтылды. Нефтиге өскөн суроо-талап аны ташуу акысын да бир нече эсеге көбөйткөн. "Афрамакс" тибиндеги танкерлер менен углеводородду чийки затты ташуунун баасы орточо эсеп менен алганда 40 миң долларга көтөрүлгөн. Бул көрcөткүч январда 10 миң долларга жакын эле.
Санкциялар күчүнө киргенде танкерлер рыногу эмне болорун азырынча эч ким айта албайт. Грециялык тармактык компаниялардын биринин башчысынын айтымында, бул акыр аягы барып оң фактор болушу мүмкүн. Нефтиге болгон суроо-талап дагы деле жогору, ал эми кемелерди АКШ, Жакынкы Чыгыш сыяктуу алыс жактардан алып келүү муктаждыгы жаралууда. Андыктан танкерлер узак жол жүрүп келгендиктен, көбүрөөк акча табышат.
Россия мунайы менен мунай заттары боюнча чектөө ЕБдин санкцияларынын алтынчы пакетине 3-июнда киргизилген. Эмбарго деңиз аркылуу ташып келүүлөргө жана түтүктөргө салынган. РФтен нефть импорттоого салынган тыюу декабрдын башына чейин, ал эми мунай заттарына 2023-жылдын февралына чейин салынган.