БИШКЕК, 18-июл. — Sputnik. Маймыл чечеги коронавирус инфекциясынын козгогучу сыяктуу кеңири жайылып кетпейт. Бул тууралуу вирусолог Анатолий Альтштейн Sputnik радиосуна берген маегинде билдирди.
"Бул вирус миллиондогон кишиге эмес, оң миңдеген, жүз миңдеген кишини да каптабайт", — деген ал.
Вирусолог коронавирус аба аркылуу тарап келсе, ал эми маймыл чечегин оорулуу адам менен байланышта болгондо жуга турганын айтты. Мындан сырткары, маймыл чечеги вирусу бир адамдан башкаларга ондон ашык ирет таралбайт.
"Оору улам тараган сайын күчүн жоготот. Маймыл чечеги вирусу бир адамдан он жолу тарагандан кийин таасири кетип, акырында жукпай деле калат", — деген вирусолог.
Бул илдет адамга жаныбарлардан жукса, каза болуп калуу тобокелдиги жогору экенин белгиледи. Анын айтымына караганда, маймыл чечегин киши жаныбардан Африкада гана жуктуруп алышы мүмкүн, ал эми дүйнөнүн калган региондорунда инфекция адамдан адамга берилет.
"Азыр дүйнөдө бир нече миң адам ооруп, Бразилияда бир бейтап көз жумду. Россиялыктар кабатырланбай эле койсо болот", — деди Альтштейн.
Адис маймыл чечеги менен коронавирустун окшоштугу — адамга алгач жаныбардан жуккандыгы, бирок экөө таптакыр башка илдет болуп саналарын белгиледи.
Соңку маалыматтар боюнча, маймыл чечегин дүйнөнүн 50дөн ашык мамлекетинде беш миңден көп киши жуктурду.