БИШКЕК, 18-июл. — Sputnik. Республикалык штаб балдардын коронавирус жуктурганын кантип билсе болорун айтып берди.
"1 жаштан 5 жашка чейинки бөбөктөр коронавирусту кадимки сасык тумоо сыяктуу көтөрүшөт. Илдет илештирген бала алсыз, ыйлаак болуп, мурду бүтүп, тамакка табити тартпай, дене табы көтөрүлөт. Ошондой эле дем алуусу оорлошуп, конъюнктивит байкалышы мүмкүн", — деп айтылат маалыматта.
Штаб коронавирус өтүшүп кеткен учурда айрымдарында мультисистемалык сезгенүү белгилери да байкаларын эскертип, аларды санап берди.
"Балдар арасында мультисистемалык сезгенүү белгилери — COVID-19га байланыштуу патологиялык абал. Бул кичинекейлердин бир нече органын жабыркатат. Оору өтүшүп кеткен учурда баланын дене табы кескин жогорулап, ичи, башы ооруп, ичи өтүп, кусат", — деп жазылат маалыматта.
Анын жүрөк булчуңдарын жана анын кабыкчаларын сезгентери кошумчаланды.
"Урматтуу ата-энелер, балдарга этият болуңуздар. Оорунун белгилери байкалган учурда биринчи кезекте жашаган жер боюнча педиатрга, үй-бүлөлүк дарыгерге кайрылуу зарыл. Эгерде баланын абалы начарлап кетсе, шашылыш 103 телефонуна чалыңыз. Тез жардам кызматы күнү-түнү иштейт", — деп жазылат штабдын эскертүүсүндө.
Ооруп калган бөбөктү бакчага жана эл көп жакка алып барбоо сунушталды.