БИШКЕК, 18-июл. — Sputnik. Россия менен тиреш учурунда Украина президенти Владимир Зеленскийдин режимин Американын финансылоосу АКШнын өзүндөгү саясий жана экономикалык туруксуздуктан улам токтошу мүмкүн. Бул тууралуу The Economist басылмасы жазгандыгын РИА Новости жарыялады.
Макаланын авторунун пикиринде, май айындагы бөлүнгөн кошумча бюджеттен, тагыраагы, 40 миллиард доллардан кийин демократ-саясатчылардын арасында Киевди колдоо үчүн болуп көрбөгөндөй акчалардын кетип жатканы нааразылыкты жаратууда.
"Украинага берилүүчү жардам — 30-сентябрга чейин эсептелген, акчанын качан түгөнөрүн эч ким билбейт. Конгресстегилердин арасынан ортодо болчу шайлоого чейин Украинага дагы ири көлөмдө каражат бөлүү үчүн документ кабыл алынат дегенге ишенгендер аз. Көптөр анткен менен дал ушундан соң кыйынчылыктар башын көтөрөрүн боолголоп турушат", — деп айтылган макалада.
The Economist АКШнын Украинанын колдоосу үч фактордон улам чайпала баштайт деп эсептейт. Биринчиси — республикачылардын ортодогу шайлоодо жеңиши жана алардын арасында партиянын жаш өкүлдөрүнүн көп болушу.
"Эгерде алар чыгымдар боюнча мыйзам долбоору менен иш алып барган Эл өкүлдөр палатасында көптүк кылып кетсе, өзгөчө күчтү теңдештиргенге жетишсе, Украинага жардам берүү оңойго турбайт", — деп жазган автор.
Аталган палатадагы демократ Рубен Галлего мындай кырдаалда Киевди колдоо такыр эле токтойт деп билдирген.
Баяндамачылар жөнөкөй америкалыктарга эмне үчүн бюджеттин акчаларын башка өлкөгө жөнөтүп, элдин финансылык кыйынчылыкка кабылгандыгын түшүндүрүү улам кыйындап бара жаткандыгын жазды. Мындай чаралардын суу кечпей калышы мындан аркы кадамдарга өзүнүн таасирин тийгизиши мүмкүн.
"Жалпысынан алганда мартка салыштырмалуу, америкалыктардын азганактай гана бөлүгү Украинаны колдоо үчүн экономикалык жактан кыйынчылыкка моюн сунушу мүмкүн. Жакында эле Мэриленд университети жүргүзгөн сурамжылоодо демократтар менен республикачылар арасында ажырымдын өтө өсүп бара жатканы айкын болгон. Демократтардын 78 пайызы Украинага жардам берүү үчүн баасы көкөлөп кеткен энергоресурстарга чыдоого макул экендигин, 72 пайызы асмандап бараткан инфляцияга наалыбай, унчукпай турарын билдирген. Ал республикачылардын 44 жана 39 пайызы гана мындай кадамга барууга кайыл экендигин айтышкан", — деп жазды басылма.
Киев режимин демөөрчүлүк акчадан ажыраткан үчүнчү фактор — Байдендин администрациясы белгисиз себептен улам көмөктөшүп, курал менен жабдый берип, чатактын узара бериши экендигин айтышты.