Климаттын өзгөрүүсү да жер титирөөгө таасирин берип, жаракалардын пайда болушуна өбөлгө түзөт. Бул тууралуу Медербек Өмүралиев Sputnik Кыргызстан радиосунда маек куруп жатып билдирди.
Анын айтымында, өлкөдө жер титирөөлөрдүн абалын текшере турган станциялардын абалы жакшы деңгээлде.
"Жер титирөөлөр жер бетинен ондогон, кээде жүздөгөн чакырым тереңдигинен тоо тектердин жылышынан пайда болот. Кыргызстан абдан кооптуу сейсмикалык аймакта жайгашкан. Өлкөдө жылына 11 миң майда жер титирөө катталат. Адистер эски жер титирөөлөрдүн изин таап, тарыхын, очогун изилдешет. Ага байланыштуу кайрадан жер силкинүүнүн кайталануу циклин болжолдоого болот. Тарыхты карасак, 1911-жылы Кеминде эң катуу 11 баллдык жер титирөө катталган. 1970-жылы Ысык-Көлдүн Ак-Суу районундагы Сары-Камыш айылында 8 баллдык жер титирөө болуп, көп кыйроолорго алып келген. Мындан тышкары, 1978-жылы Түп районунда 7-8 баллга жеткен силкинүү болгон. Бүгүнкү күндө бизде 30га жакын сейсмологиялык станция бар. Күн сайын абалды көзөмөлдөп, илимий тыянак чыгарып турушат. Зилзалада сейсмикалык толкундар пайда болуп, бизде анын 6-7 түрү катталат", — деди Өмүралиев.
Ошондой эле адис сейсмикалык очоктордун картасы түзүлүп, ал Кыргызстанда жана чектеш аймактагы жер титирөөлөр тууралуу маалымат берилерин кошумчалады.