БИШКЕК, 16-июл. — Sputnik. Америкалыктардын көбү, анын ичинде илимий коомчулуктун өкүлдөрү президент Владимир Путиндин Россия менен Украинанын тарыхый биримдиги тууралуу пикирине кошулат. Бул тууралуу АКШнын Россиядагы мурдагы элчиси Майкл Макфол "Украинская правда" басылмасына берген маегинде билдиргенин РИА Новости жазды.
"АКШда Путиндин Украина тууралуу айткан айрым сөздөрүнө кошулгандар көп. Мисалы, "орустар, украиндер, баары бирдей, туурабы? Алардын тилдери да окшош, туурабы?" дегени. Бул пикирди окумуштуулар менен профессорлор да талкуулашат", — деген Макфол.
Экс-дипломат белгилегендей, америкалык эксперттер Россия дагы, Украина дагы өз тарыхын Байыркы Русь мамлекетинен баштаганын билишет.
Макфол Вашингтон Киев менен бирге билим берүү программасын ишке ашырышы керектигин, ал аркылуу дүйнө Украинанын жаңы тарыхын биле алмак деген пикирин билдирди. Анын айтымында, бул Батыш үчүн пайдалуу болмок.
Владимир Путин былтыр 12-июлда "Орустар менен украиндердин тарыхый биримдиги жөнүндө" деген аталыштагы макаласын жарыялаган. Анда ал эки элдин мамилесине жарака кетишин чоң апаат деп атап, Украина анык суверенитетке Москва менен өнөктөш болгондо гана жете аларын белгилеген.