БИШКЕК, 14-июл. — Sputnik. Киргизилген электрондук системалар жакшы жардам берип жатса, экинчи жагынан күч түзүмдөрү контрабанда, коррупция менен аёосуз күрөшүп жатат. "Крыша болуу" деген түшүнүктү таптакыр жок кылып жатабыз. Бул тууралуу президент Садыр Жапаров министрлер кабинетинин жыйынында билдирди.
Эскерте кетсек, өлкө башчынын төрагалыгынын алдында өкмөт жарым жылдык ишинин жыйынтыгы тууралуу отчёт берип жатат.
Жапаров министрлерге, бардык мамлекеттик органдардын жетекчилерине, аймак башчыларына эскертүү берди.
"Кимде-ким туура эмес иштерге аралашып, бирөөлөргө "крыша" болуп, же мамлекетке каршы иштердин аркасында турчу болсоңуздар, эч кимиңерди ушул кезге чейинки кылган бардык сиңирген эмгегиңерге карабайбыз! Өтө катуу жана катаал чараларды көрөбүз. Биздин мамлекетте коом өтө ачык, эч нерсени жаап-жашыра албайсыңар. Текшерүүчү органдардын оозун жапканыңар менен эл өзү ачыктап, туура-туура эместигин териштирип, алаканыбызга салып берет. Ушул жерде отурган бардык жетекчилердин кулагына күмүш сырга: биз кабыл алынган чечимдердин бардыгы сиздердин колдон жалпыланып, анан кабыл алынат", — деди Жапаров.
Президент кабыл алынган чечимдер элдин жакшы жашоосуна да, түйшүккө малынышына да түрткү болорун белгиледи.
"Ошондуктан жакшылап терең ойлонулган чечимдердин болушу негизги шарт. Жети өлчөп, бир кесип анан кабыл алып туралы. Жүзүбүз ар дайым жарык болсун десеңер эл үчүн, мамлекет үчүн ак дилиңерден таза иштешиңерди катуу талап кылам. Биз бийликке эл үчүн иштейли деп келдик. Бул максат ар бир министрлер кабинетинин мүчөсүнүн, ар бир мамлекеттик кызматкердин жүрөгүндө болушу керек. Биз чыгарган чечимдер жалпы элибиздин жашоосунун сапатын жогорулатууга багытталышы керек. Бардык программаларыбыздын, стратегиялык документтерибиздин өзөгү — элибиздин бакубат жашоосун камсыз кылуу", — деди өлкө башчы.
Ал башка маселелерге убакытты да, ресурстарды да коротуп кереги жок экенин кошумчалады.