БИШКЕК, 14-июл. — Sputnik. Пессимисттик божомолдорго карабай 2022-жылдын биринчи жарым жылдыгында ички дүң продукциянын өсүү темпи 6,3 пайызды түздү. Бул тууралуу министрлер кабинетинин төрагасы Акылбек Жапаров жыйында билдирди.
Анын айтымында, ИДПга карата пессимисттик божомолдорду Кыргызстандын ичиндеги жеке оппоненттер эле эмес, эл аралык финансылык институттар да берип келишкен.
"Алсак, Дүйнөлүк банк 2022-жылы Кыргызстанда ички дүң продукция 5 пайызга чейин кыскарат десе, Moody's деген рейтинг агенттиги экономика бир пайызга чейин ылдый түшөт деген. Ал эми Эл аралык валюта фонду 0,9 пайызга чейин гана өсөт десе, өзүбүздүн эле өнөктөш Евразия өнүктүрүү банкы бир пайыздан ашпайсыңар деген божомолун айткан", — деди Жапаров.
Министрлер кабинетинин төрагасы президент Садыр Жапаров башында турган аткаруу бийлигиндеги министр, жетекчилер бир команда болуп иштеп, ИДП 6,3 пайызга көтөрүлгөнүн белгилеген. Ал бул жерде Жогорку Кеңештин да эмгеги бар экенин айтып, керектүү мыйзам долбоорлорун убагында кабыл алып бергенин айтты.
Жапаров ички дүң продукциядагы көрсөткүчтөр эмненин эсебинен болгонун түшүндүрүп берди.
"Биринчиден, экономиканын бардык тармактарында өсүш байкалды. Алсак, айыл чарба тармагында 2 пайыз, курулушта 3,4 пайыз, кызмат көрсөтүүдө 4 пайыз, өнөр жайында 14,6 пайыз өсүш катталды. Өнөр жай тармагына өзгөчө токтоло кетейин. Тоо кен жаатында салыктык киреше алты айдын жыйынтыгында 25,8 миллиард сомду түздү. 2021-жылы 22,9 миллиард сом эле киреше алганбыз. Бир жылда чогулткан салыкты биз жарым жылда эле алдык. Салыктын 70 пайызын "Кумтөр" берди. Бул алтын кенди алганыбыздын биринчи жыйынтыгы деп эсептейм. Калганын башка кендер берди", — деди Жапаров.
Белгилей кетсек, учурда министрлер кабинетинин жыйыны өтүүдө. Анда бийлик 2022-жылдын биринчи жарым жылдыгында өлкөнүн социалдык-экономикалык өнүгүүсүнүн жыйынтыгы тууралуу отчёт берип жатат.