БИШКЕК, 13-июл. — Sputnik. Батыш Украинага көрсөтүлүп жаткан аскердик жардам баш оорудан башка эч нерсе алып келбей турганын аңдай баштады. Азыркыдай абал создуга берсе кесепетин АКШ менен европалык мамлекеттер тартат. Мындай өңүттөгү макала Global Times гезитине жарыяланды.
"АКШ президенти Жо Байдендин Украинага "канча убакыт зарыл болсо ошончо жардам берерин" айтканы менен Америка деле, союздаштары деле кризистен чарчап, тажай баштады. Бул өзгөчө энергетикалык жана азык-түлүк кризисинин башталышы, инфляциянын өсүшү жана Киевге кеткен чыгымдын өсүп жатышынан улам байкалууда", — деп айтылат материалда.
Гезиттин жазганына караганда, АКШ менен Батыш Киевге дагы канча убакыт жардам берет деген суроолор көбүрөөк жаңыра баштады. Айрым америкалык ЖМКлар АКШ Украинага сарптаган ири суммага нааразы болушууда.
"Алгач Кошмо Штаттар Украинаны Россияны сындыруу үчүн ыңгайлуу кол жоолук катары пайдаланмак болгон. Ою ишке ашкан жок. Тескерисинче, Москва мындай кырдаалдан пайдаланып, АКШ менен Батыш мамлекеттердин өзүн жарга такап отурат. Америкалык стратегия айланып келип АКШнын өзүнө сокку урушу мүмкүн", — деген аскерий эксперт Сун Чжунпин.
Анын айтымында, украин каатчылыгы канчалык көбүрөөк создуга турган болсо, АКШ менен Батыш ошончолук зыянын тартат. Сун бул кризисте көзөмөлдөөгө мүмкүн болбой калчу факторлор болорун белгилөөдө.
"Мындай кырдаалда АКШ менен анын союздаштары Украинага көрсөткөн колдоосу түпсүз туңгуюк экенин жакында түшүнөт. Кесепети алар үчүн оор болот", — деди эксперт.
Украинага берилип жаткан ири суммадагы жардам АКШны кыйын абалга кептөөдө: мындан аркы колдоо мамлекет үчүн да, экономика үчүн да чоң жүк болуп, инфляцияны күчөтөт, болбосо Вашингтондун буга чейинки аракети текке кетип калат. "Украина кризисин козуткан тарап катары АКШ өзүн өзү бутка атып жатат" деп айтылат макалада.
Учуру келгенде АКШ менен Батыштын улам өсүп жаткан калкы Украинага мурункудай көлөмдө колдоо көрсөтүү өтө эле оорчулук келтирерин түшүнөт. "АКШ менен Батыш кайсы тарап жеңилүүгө дуушар болуп жатканын аңдай баштады", — деп жазган басылма.
Россиянын 24-февралда баштаган атайын операциясынан улам Вашингтон союздаштары менен Украинаны курал-жарак менен камсыздоосун улантууда. Москва батыш куралынын жеткирилиши жаңжалды создуктуруп жатканын, аны ташыган транспорт мыйзамдуу бута болуп каларын айтып келет.
АКШ президенти Жо Байден Киевге аскердик, экономикалык жана гуманитардык жардам бөлүү тууралуу мыйзам долбооруна кол койгон. Конгресс сумманы өлкө башчы сураган 33 миллиарддан 40 миллиардга чейин жогорулатты. Кийинчерээк Кошмо Штаттар Киев үчүн кошумча жардамдын жаңы пакети тууралуу жар салган.