БИШКЕК, 7-июл. — Sputnik. Эгер курал-жарак менен жабдуу улантыла берсе, Украина дүйнө картасынан жоголуп кетиши мүмкүн. Бул туурасында АКШнын коргоо министринин мурдагы кеңешчиси, полковник Дуглас Макгрегор Sky News Australia телеканалынын эфиринде билдиргенин РИА Новости жазды.
Эксперт Батыш өлкөлөрүн, тагыраагы, Австралияны Киевге аскердик жардам көрсөткөнү үчүн сындады. Ал кырдаалды тынчтык жолу менен жайгарууга көмөктөшсө болмоктугун, болбосо Украина талкаланып, калкы кырылып калышы күтүлүп жатканын белгиледи.
"Бул эми толук кандуу мамлекет болбой калды, ал дүйнө картасынан түп-тамыры менен жоголуп кетиши мүмкүн. Салгылашууну токтотуш керек деп эсептейм. Австралия ушуну талап кылышы керек, себеби Вашингтондо эч ким мындайга барбайт. Бирок Берлин, Париж, Лондондун элинде салгылашууну токтотуу, мунасага келүү идеясын колдогондор көбөйүп жатат. Себеби биз эң акыркы украин калганга чейин күрөшө албайбыз да", — деди Макгрегор.
Буга чейин "Франс Пресс" агенттиги Австралиянын премьер-министри Энтони Альбанезе Украинага 14 сооттолгон транспортер, 20 пулемет менен жабдылган Bushmaster ок өтпөс техника жана бир нече учкучсуз аппарат берүүнү убадалаганын жазган.
Россия буга чейин киевдик режимге курал ташууга катышкан өлкөлөрдүн баарына дипломатиялык нота жиберген. Тышкы иштер министри Сергей Лавров ал курал-жарактар Россияга каршы колдонуларын белгилеген.