БИШКЕК, 5-июл. — Sputnik. Ош облусундагы Өзгөн районунун тургуну Бузуура Жаанбаева жети күндөн бери дайынсыз болууда. Бул туурасында Ош ОИИБдин маалымат кызматы кабарлады.
Ош облусундагы Өзгөн районунун тургуну Бузуура Жаанбаева жети күндөн бери дайынсыз болууда
© Фото / пресс-служба УВД Ошской области
Милицияга 34 жаштагы келиндин кайнатасы кайрылып, ал 28-июнь күнү болжол менен саат 08:00дөр чамасында Өзгөндүн Төрт-Көл айыл аймагынын Шоро-Башат айылындагы үйүнөн чыгып кеткен бойдон дайынсыз болуп жатканын билдирген.
Жаанбаева башына ак жоолук салынып, үстүнө жашыл түстөгү көйнөк, кара шым, боз түстөгү бут кийим кийип чыккан. Өзгөчө белгилери: бою 160-165 сантиметр, арык чырай, кара тору, кашы-көзү кара, чачы узун, кара экени айтылды.
Ош милициясы жарандардан жоголгон келин тууралуу кандайдыр бир маалымат болсо кабарлап коюуну өтүнөт. Телефону: 03233 5-06-36, 0550 334323, 0779 334323, 0504 445541.