БИШКЕК, 4-июл. — Sputnik. Дүйшөмбүгө караган түнү саат 2:00дөр чамасында Кой-Таштагы аскер бөлүктө кызмат өтөп жаткан жоокер каза болду. Кабарды Коргоо министрлигинин маалымат кызматы тастыктады.
"№73809 аскер бөлүгүндө кызматын өтөп жаткан 22 жаштагы катардагы жоокер Ж.Э. постто сакчылык кызматында турган. Курал колдонуудагы этиятсыздыктан кокустуктан ок чыккан. Аскер кызматчысы алган жараатынан улам жеринде көз жумган", — деп айтылат маалыматта.
Окуя болгон жерде Кыргызстан Куралуу күчтөрүнүн Генералдык штабынын жетекчилиги, Аскер прокуратурасынын кызматкерлери, Аламүдүн РИИБдин эксперттери жана аскер бөлүктүн командачылыгынын курамынан түзүлгөн комиссия иштеп жатканы маалым болду.