БИШКЕК, 2-июл. — Sputnik. Жалал-Абад шаарынын аймагындагы тез татым жайларына жүргүзүлгөн рейдде дээрлик бардыгында тамак-ашты сактоо санитардык талаптарга жооп бербегендиги, анда иштегендердин медициналык текшерүүдөн өткөндүгү жөнүндө тийиштүү иш кагаздары жок экендиги аныкталды. Бул тууралуу Жалал-Абад мэриясынын маалымат кызматы билдирди.
"Мындан улам кемчиликтер жоюлуп, Жалал-Абад райондор аралык оорулардын алдын алуу жана санитардык-эпидемиологиялык борбору уруксат бергенге чейин менчигинин түрүнө карабай бардык тез татым жайлары бүгүн, 2-июлдан тартып жабылууда", — деп айтылган маалыматта.
Текшерүү иштери бүгүн, ишемби күнү, калаа мэри Эрнисбек Ормоковдун тапшырмасы менен жүргүзүлгөндүгүн кабарлашты.
Мэр кафе-ресторандарды, ашкана, тез татым жайларын тыкыр текшерип чыгууга тапшырма берген. Санитардык талаптарга жооп бербесе, айып пул салып, кемчилигин жоймоюнча эч нерсесине карабай жаап туруу зарылдыгын катуу эскерткен.
Эске салсак, буга чейин 27-июнь күнү аталган шаардагы "Ага-ини" тез татым даярдоочу жайынан тамак жеген 40 адам ууланган. Учурда алардын 28и ооруканада болсо, 12си үй шартында дарыланып жатат. Тез татым жайы жабылып, ээсине 7,5 миң сом айып салынган.
Андан кийин Тадж-Махал тез татым даярдоочу жайынан тамактанган 14 адам ууланып ооруканага кайрылган. Алардын бири Өзгөн районунун жашоочусу жандандыруу бөлүмүнө түшкөн.
Шаар бийлиги жана тийиштүү кызматтар тарабынан аталган тез татым окуя катталгандан кийин убактылуу жабылган. Шаардык милиция массалык уулануулар боюнча окуяны бирдиктүү реестрге каттап, учурда тергөө амалдары жүрүп жатканын айткан.