БИШКЕК, 1-июл. — Sputnik. Чүй облусунун мурдагы жетекчиси Туйгунаалы Абдраимов мамлекетке келтирилген зыяндын ордун толтуруп үй камагына чыгарылды. Бул тууралуу УКМКнын маалымат кызматы кабарлады.
Буга чейин УКМК Абдраимов БШКнын төрагасы болуп турган учурда кызматтык абалынан пайдаланып, Ысык-Ата районунун "Жээк" айыл өкмөтүнүн жооптуу кызматкерлерин 11,2 гектар таштанды таштоочу жайын "Кайнар" ишканасына бекер бөлүп берүүгө мажбурлаган деп билдирген. Андан сырткары, аталган компаниянын 95 пайыз акциясына ээлик кылат деп айткан. Мындан улам 1-майда атайын кызмат тарабынан кармалган.
"Туйгунаалы Абдраимов өзүнүн мыйзамсыз аракеттерин түшүнүп, кылган ишине өкүнүп, жазасын жеңилдетүү максатында 11,2 гектар жер тилкесин (таштанды таштоочу жай) Ысык-Ата райондук акимчиликтин балансына өткөрүп берди. Иш боюнча белгиленген 15,3 миллион сом зыяндын ордун толтурду. Ошондой эле Ысык-Ата курортунун аймагында жайгашкан конок имаратын өз ыктыяры менен Кыргызстан профсоюздар федерациясынын балансына өткөрүп берди", — деп айтылат маалыматта.
Буга байланыштуу 29-июнунда Биринчи май райондук соту УКМКнын тергөөчүсүнүн өтүнүчү менен Абдраимовдун баш коргоо чарасын үй камагына өзгөрткөн.
Тергөөнүн жыйынтыгы менен бул кылмыш иши сотко жөнөтүлөрү белгиленди.