Ошол эле учурда альянс өзүн коргонуучу жана "эч бир өлкөгө кооптуулук туудурбагандай" мүнөздөдү деп белгилейт Петр Акопов. Ушул маселеге баам салган серепчинин кезектеги калем шилтеми РИА Новости сайтына жарык көргөн. Бирок союздаштар "Россия тараптан келген коркунучтарга каршы туруштук берүүнү", анын ичинде "Украинага саясий жана практикалык колдоосун күчөтүп", "чыгыш канатка кошумча күчтөрдү" уюштурууну улантат. Россиядан "Украинадан кетүүнү" талап кылат. Декларацияда бул кантип ишке ашырылары ачык жазылбайт.
Улуу Британиянын тышкы иштер министри Лиз Трасс Мадриддеги жыйындагы сөзүндө: "Азыр президент Зеленский күчтүн позициясын таянуу менен сүйлөшүүлөрдү жүргүзө алышы үчүн Украинага Россияны жеңүүсү үчүн камсыздоону эки эсеге арттыруунун дал убагы. Биз Украинада Россиянын жеңилишине жетишүүгө тийишпиз. Муну европалык коопсуздук, эркиндик жана демократия үчүн аткаруубуз абзел. Бул – узак мөөнөттүү тынчтыкка жетүүнүн жападан жалгыз жолу. Менин оюмча, адегенде Россияны жеңип, андан соң сүйлөшүүлөрдү жүргүзүү керек", – деген оюн ортого салды.
Айтмакчы, жыйында НАТОнун стратегиясы кабыл алынды. Россиядан башка концепцияда алгач ирет Кытай жөнүндө төмөнкүчө камтылат:
"Кытайдын дымактары жана анын мажбурлоо саясаты биздин кызыкчылыктарыбызга, коопсуздугубузга жана баалуулуктарыбызга коркунуч туудурат. Кытай өзүнүн эл аралык таасирин күчтөндүрүү үчүн саясий, экономикалык жана аскердик инструменттерге кайрылат". Бирок кеп Россия менен Кытай Эл Республикасынын "терең стратегиялык өнөктөш" болгонунда.
НАТО — бул англосактардын өздөрүнөн көз каранды континенттик европалык державалар менен альянсы. Ал эми англосактардын кызыкчылыгы бардык жерде бар. Ошондуктан аларга дүйнөнүн булуң-бурчундагы өз алдынча бир өлкө да "коркунуч жаратышы" ажеп эмес. Иран же Венесуэла, Түндүк Корея же Мьянма болушу мүмкүн, бирок булар кутулгандары. Ал эми Ирак менен Ливия – талкаланып калгандары. Кытайдын Тынч океан чөлкөмүндө иши арбын, ал өз чегинде турат. Россия да альянстын андан ары бет алышына жолтоо болууга дегеле кызыкдар эмес.