БИШКЕК, 30-июн. — Sputnik. Министрлер кабинети Түркиянын анча белгилүү эмес Nida Inshat деген компаниясына 39 жылга аэропортторду сырткы башкарууга берүүнүн алдында турат. Бул туурасында Жогорку Кеңештин депутаты Жанар Акаев билдирди.
Белгилей кетсек, кечээ парламенттин жыйынында министрлер кабинетинин төрагасы Акылбек Жапаров "Манас" жана "Ош" аэропорттору түркиялык компанияга 50 пайыздык үлүш менен берилерин айткан. Алар эки жылда 501 миллион доллар инвестиция жасай турганын билдирген.
Ал эми бүгүн Акаев мындай келишим улуттук кызыкчылыкка каршы келерин айтып, ЖК спикерине, президентке, УКМК төрагасына кайрылды.
"Бул эч туура эмес. Анткени Дүйнөлүк банк IFC менен келишим түзүп, ачык конкурс өткөрүлөт деп айтылган эле. Германиядан, Голландиядан, Түштүк Кореядан ири компаниялар катышууга аракет кылып жатканда эч кандай конкурс, тендери жок эки чоң стратегиялык объектибизди бергени жатабыз. Ведомстволор аралык комиссия терс корутунду бергенине, Тышкы иштер министрлиги да "болбойт, улуттук кызыкчылыкка каршы" келет дегенине карабастан министрлер кабинети Nida Inshat компаниясына карматканы калды", — деди Акаев.
Ошондой эле ал аэропортторду сырткы башкарууга алып жаткан ишкана 557 миллион доллар инвестиция саларын айтып, бирок учурда "Манас" аэропорту бир жылда эле 50 миллион доллардан киреше берип жатканын белгиледи.