БИШКЕК, 29-июн. — Sputnik. Жогорку Кеңештин депутаты Медер Алиев кесиптеши Адахан Мадумаровдун кадамдарын сындап, артисттик кылып жатат деп сыпаттады.
Бүгүн жыйындын башында мурунку жумада каралган мыйзам долбоорлоруна добуш берилип жаткан. Мадумаров чыгып депутаттар эмнеге добуш бергенин билбей жатканын айтып, добушка коюунун алдында кененирээк түшүндүрмө берүүнү талап кылды.
"Депутаттардын баары бири-бирибизден "кайсы мыйзамга, эмнеге добуш берип жатабыз?" деп сурап жатабыз. "Койчу эми" деп эле кетип баратат. Мыйзам кабыл алууну оюнчукка айландырып алдык. Ал мыйзамдардын артында миңдеген, миллиондогон адамдардын тагдыры жатат. Бул мыйзам талкууланганына канча өттү, кимдин эсинде эмне калды", — деди Мадумаров.
Андан соң Алиев кесиптеши регламент бузулбаганын билип туруп шоу кылып жатат деп нааразы болду.
"Өткөндө социалдык түйүндө бирөө "циркке барсаң акча төлөп киресиң, Жогорку Кеңештин айрым депутаттарына дагы акча бериш керек. Алар элге шоу көрсөтүп жатат" деп жазыптыр. Адахан Кимсанбаевич, эмнеге шоу кылып жатасыз? Баарын билип туруп, элге жагынайын деп жатат. Бул жерде баары акылсыз, бир эле ошол сабаттуу болуп жатканы өкүндүрөт да. Айланып кетейин, сиз муну беш колуңуздай билесиз. Уят да эми. Буга чейин ушинтип эле добуш берип келгенсиз, анан эмнеге артист болуп жатасыз. Ушуга чейин чыдадым, популизмдин дагы чеги болуш керек да", — деди Алиев.
Мадумаров отурган жеринен эле "жашсың да, жашсың" деп жооп берип тим болду.