АКШнын Техас штатында мигранттардын сөөгү менен ташталган жүк ташуучу унаа табылды. ABC телеканалынын маалыматына караганда, жүк ташуучу унаа ири трассага алып барчу жолдо токтотулган. Анда 46 адамдын сөөгү болгон.
Дарыгерлер ысык өтүп кеткен деп 16 жабырлануучуну ооруканага жаткырышты. Алардын ичинен төртөө — жашы жете элек балдар.
Сан-Антонио шаарынын өрткө каршы кызматынын маалыматы боюнча, унаада суу да, кондиционер да болгон эмес. Бийлик териштирүү иштерин баштады.
Техас штатынын губернатору Грегг Эбботт каргашалуу окуяга АКШ президенти Жо Байденди айыптап жатат. Анын пикиринде, миграциялык саясаттын жумшарышы трагедияга алып келди.
Эске салсак, АКШнын мурдагы президенти Дональд Трамп иммиграция саясатын жана чек арадагы көзөмөлдү күчөтүү үчүн бир катар чараларды көргөн. Анын ичинде Мексика менен чек арага дубал куруу демилгесин көтөргөн. Трамп бул чара мыйзамсыз иммиграцияны жана баңгизат аткезчилигин ооздуктоого жардам берет деп эсептеген.
Ал эми Жо Байден өзүнүн инаугурациясынан көп өтпөй өлкөнүн иммиграция мыйзамдарын жумшартуучу жарлыктарга кол койду. Анын мамлекет башчысы катары алгачкы кадамдарынын бири Мексика менен чек арадагы кырдаалга байланыштуу Трамп киргизген өзгөчө кырдаал режимин алып салуу болгон.